"Sabah"ın baş məşqçisi Murad MusayevMisli Premyer Liqasının 10-cu turunda “Zirə”yə evdə qalib gəldikləri matçdan (1:0) sonra mətbuat konfransı təşkil edib. Futbolmedia.az xəbər verir ki, mütəxəssis əvvəlcə oyunla bağlı fikirlərini bölüşüb:

- Parlaq oyun gördük. Hər iki tərəf hücum edirdi. Düşünürəm ki, oyuna baxanlar məmnun qaldılar. Tempi sona qədər yüksək saxlaya bildik. Düşünürəm ki, bir epizodda penalti də var idi. Vacib qələbə qazandıq. Bu gün meydanın hər metrində mübarizə var idi.

- İstədiyiniz komandanı formalaşdırmısınız?

- Xeyr. Bu proses davam edir. Bu gün ən yaxşı oyunlarımızdan birini oynadıq. Rəqibin üslubu da vacibdir. “Zirə” açıq futbol oynayırdı. Rəqiblər bəzən qapanır. Çalışmalıyıq ki, arsenalımızda olan şeyləri inkişaf etdirək.

- İlk dövrəni 2-ci yerdə başa vurdunuz. Sizcə, daha yaxşı ola bilərdi?

- Layiq olduğumuz yerdəyik. “Şamaxı” və “Neftçi”yə son dəqiqə qolları ilə qalib gəlmişik. Futbol belədir. Bəzən alınır, bəzən yox.

- Qapıda Yusif İmanova şans verirsiniz, amma daha iki qapıçınız da var. Bəs, düşünmürsünüz ki, onlar formadan düşür?

- Digər komandalarda da 4 qapıçı var. Çox önəmli mövqedir. Hər dəfə dəyişiklik etmək olmur. 3 oyundur, qol buraxmırıq. Çox dəyişikliyə ehtiyac yoxdur.