“Dinamo”nun (Zaqreb) baş məşqçisi Jelko Kopiç “Hayduk”a məğlubiyyəti şərh edib.

Zaqreb təmsilçisi 9-cu turdan təxirə salınmış vacib görüşdə səfərdə "Hayduk"la qarşılaşıb və 0:1 hesabı ilə uduzub. Millimizin futbolçusu Mahir Emreli start heyətdə yer alıb və ilk dəfə Xorvatiya liqasında 90 dəqiqə meydanda olub.

Futbolmedia.az xəbər verir ki, oyundan sonra keçirilən mətbuat konfransında Kopiç deyib:

“Biz 4-2-3-1 sistemi ilə oyuna başladıq. Yaranmış qol vəziyyətlərindən istifadə edə bilmədik. İkinci hissədə müəyyən dəyişiliklər etmək istədik. Yekun nəticədə qol buraxdıq. Biz mütləq qol vurmalı idik. Amma bunu edə bilmədik. Biz gözləməməliyik ki, müdafiə xəttimiz bütün oyun boyu qol buraxmadan oturacaq. İndi qarşıda bizi 5 oyun gözləyir. Hər şey ancaq özümüzdən asılıdır. Növbəti oyuna hazırlaşacaq və qələbəyə ümid edəcəyik”.

“Dinamo” 31 oyundan 66 xalla yenə lider olsa da, onunla rəqibləri arasında xal fərqi azalıb. Hazırda 2-ci yeri tutan “Osiyek”in 64, 3-cü pillədəki “Hayduk”un 62 xalı var.