“Mançester Yunayted”in sabiq vingeri Ceydon Sanço karyerasını “Xetafe”də davam etdirməyəcək.

Futbolmedia.az “Marca”-ya istinadən xəbər verir ki, azad agent statusunda olan ingiltərəli futbolçu bu gün “Xetafe”nin prezidenti Anxel Torresə komandaya qoşulmayacağını bildirib. İspaniya klubu daha əvvəl onunla danışıqlar aparırdı.

Sanço mövsümün sonuna qədər təxminən 3 milyon avro qazanmaq istəyib. İngiltərə mətbuatında “Xetafe”nin ona 400 min avro maaş təklif etdiyi yazılsa da, bu məlumat həqiqəti əks etdirmir. Klub futbolçuya daha yüksək məbləğ ödəməyə hazır olub, ancaq təklif yenə də onun maliyyə tələblərinə uyğun gəlməyib.

26 yaşlı oyunçunun Səudiyyə Ərəbistanı klubundan da təklifi var. Həmin klubun futbolçunun maliyyə tələblərini qarşılamağa hazır olduğu bildirilir.

Sanço ötən mövsüm icarə əsasında “Aston Villa”da çıxış edib. O, İngiltərə Premyer Liqasında 23 oyunda meydana çıxıb və 2 məhsuldar ötürmə verib.