“Sabah”ın və Qazaxıstan millisinin qapıçısı Stas Pokatilov yığmanın düşərgəsinə qayıtması, UEFA Çempionlar Liqasındakı çıxışı və “Old Trafford”dakı atmosfer barədə danışıb.

Futbolmedia.az Qazaxıstan Futbol Federasiyasının mətbuat xidmətinə istinadən müsahibəni təqdim edir.

– Əhvalınız necədir?

– Əladır. Şəhərə qayıtdığım üçün xoşbəxtəm.

– Milliyə dəvət aldığınız zaman hansı hissləri keçirdiniz?

– Həmişə xoş hisslər olur. Mən həmişə deyirəm ki, milliyə qayıtdığım üçün xoşbəxtəm.

– Çempionlar Liqası barədə soruşmaya bilmərik. Hər şey necə keçdi? “Old Trafford”dakı atmosfer necə idi?

– İnanılmaz atmosfer, inanılmaz hisslər idi. Bütün bunları daim təkrarlamaq və rəqibin kimliyindən asılı olmayaraq növbəti oyunu gözləmək istəyirsən. Çempionlar Liqası yaxşı mənada narkotik kimidir.

– Siz Qazaxıstandan Çempionlar Liqası, Avropa Liqası və Konfrans Liqasında oynamış ilk futbolçusunuz. Özünüzlə qürur duyursunuz?

– Bilmirəm. Yəqin ki, hazırda bütün bunları o qədər də dərk etmir və hiss etmirəm. Yəqin, karyeramı bitirdikdən sonra nəvələrimə danışaram.

– Komanda yoldaşlarınız üçün darıxmışdınız?

– Əlbəttə.