İspaniya millisinin keçmiş qapıçısı İker Kasilyas sabiq klubu "Portu" və sığorta şirkəti qarşısında 3,7 milyon avro məbləğində təzminat tələbi ilə məhkəməyə müraciət edib.

Futbolmedia.az AS nəşrinə istinadən xəbər verir ki, o, 2019-cu ilin mayında məşq zamanı keçirdiyi miokard infarktının həddindən artıq fiziki yüklənmənin nəticəsi olduğunu iddia edir.

Kasilyas həmin hadisədən sonra əmək qabiliyyətini itirdiyini və bu günə qədər ciddi sağlamlıq problemləri yaşadığını bildirib. Portuqaliyada keçirilən məhkəmə iclasında çıxış edən 45 yaşlı sabiq qolkiper bunları deyib:

“İdman zalına gedirəm, padel oynayıram. Amma qaça bilmirəm. Maksimum 20-50 metr qaçıram, sonra davam edə bilmirəm”.

Klubun həkimi Nelson Puqa isə vaxtilə Kasilyasın vəziyyətinin stabil olduğunu və tam sağalmasının mümkünlüyünü bildirib. Onun sözlərinə görə, məşqdəki fiziki yük infarktın əsas səbəbi olmayıb.

Məlumata görə, məhkəmə Kasilyasın peşəkar idmançı kimi tam və daimi əmək qabiliyyətinin itirlməsi statusu alıb-almamasına qərar verəcək. Məhkəmə Kasilyasın iddiasını qəbul etsə, ona əlavə milyonlarla avro kompensasiya ödənilə bilər.

Qeyd edək ki, sığorta şirkəti futbolçuya artıq 1,5 milyon avro ödəyib. “Portu” isə Kasilyasın karyerasını başa vurmasına qədər ona müqavilə üzrə maaşının tam şəkildə verildiyini açıqlayıb və əlavə ödəniş etmək niyyətində olmadığını bildirib.