2026/27 mövsümü üçün Misli Premyer Liqasına vəsiqə qazanmaq uğrunda bu gün "Qəbələ" "Mingəçevir"ə 2:0 hesabı ilə qalib gəlib.

Futbolmedia.az xəbər verir ki, "qırmızı-qaralar"ın baş məşqçisi Kaxaber Sxadadze matçdan sonra oyun barədə fikirlərini bölüşüb:

"Birinci növbədə azarkeşləri təbrik edirəm və eyni zamanda qeyri-sabit mövsüm keçirdiyimiz üçün üzr istəyirəm. Mövsüm ərzində sabitlik olmadı, çox gərgin əsəbi anlar yaşadıq. Qələbə münasibətilə futbolçuları təbrik edirəm. Əlbəttə ki, favorit biz sayılırdıq. Lakin bunu meydanda sübut etmək lazım idi. Şadam ki, futbolçular oyuna ciddi yanaşdılar. Yaxşı, baxımlı oyun göstərdilər. Sadəcə az qol vurduğumuz üçün narazı qaldıq. Çox qol vəziyyətləri yaratdıq, lakin istifadə edə bilmədik. Bu pisdir. Futbolçuların çoxu gəncdir, belə oyunlarda daha etibarlı olmalıdırlar. Artıq birinci hissədə məsələni həll edə bilərdik. Rəqibin çox təcrübəli baş məşqçisi var. Ramiz Məmmədovu çoxdan tanıyıram və ona hörmətim var. Onların əsas üstünlüyü də məşqçiləri idi. Bu oyuna qədər gəlib çıxmaları onun əməyinin nəticəsidir. Amma qələbəyə layiq olan biz idik".

Mütəxəssis daha sonra mətbuat nümayəndələrinin onun klubdakı gələcək taleyi ilə bağlı sualına qısa cavab verib:

- Bu, "Qəbələ"nin baş məşqçisi kimi son oyununuz idi?

- Hazırda müqaviləm var. Başqa suallarınız varsa, kluba ünvanlaya bilərsiniz.