Bu gün Misli Premyer Liqasında 33-cü tur çərçivəsində "Araz-Naxçıvan" "Zirə"yə 3:2 hesabı ilə qalib gəlib.

Futbolmedia.az xəbər verir ki, oyundan sonra keçirilən mətbuat konfransında "Araz-Naxçıvan"ın baş məşqçisi Andrey Demçenko oyun barədə fikirlərini bölüşüb:

"Qələbə qazanmaq hər zaman xoşdur. Futbol oynamağa çalışdıq və düşünürəm ki, layiqli qalibiyyət əldə etdik. Qarşımızda yaxşı rəqib var idi. "Zirə" nə istədiyini bilən, çox yaxşı təşkilatlanmış komandadır. Baş məşqçinin işi görünür, topu hara gəldi vurmağa çalışmırlar, futbol göstərməyə çalışırlar. Futbolçularımı qələbə münasibəti ilə təbrik etdim".

Ukraynalı mütəxəssis komandasının oyunundakı bəzi çatışmazlıqlara və son dəqiqələrdəki gərginliyə də toxunub:

"Biz layiqli qələbə qazandıq. "Zirə"ni üstələməyə çalışdıq. Təssüf ki, bəzi xırda vəziyyətlərdə səhvlər edir, rəqibə şans verirdik. Qapımızda da qol görürdük. Amma daha çox möhkəmlənmək, daha yüksək yerlər üçün daha səliqəli, daha ağıllı futbol oynamaq lazımdır. Topu möhkəm saxlamaq, sadə vəziyyətlərdə rəqibə verməmək lazımdır. Bu gün hardasa bəxtimiz də gətirdi. Son dəqiqələrdə qapımıza penalti təyin edildi. Heç-heçə də ola bilərdi, amma qələbə qazandıq".