"Araz-Naxçıvan" Misli Premyer Liqasının 20-ci turu çərçivəsində "Sumqayıt"a 1:0 hesabı ilə qalib gəlib.

Futbolmedia.az xəbər verir ki, Naxçıvan təmsilçisinin baş məşqçisi Andrey Demçenko matçdan sonra keçirilən mətbuat konfransında oyun barədə fikirlərini bölüşüb.

Ukraynalı mütəxəssis komandasının oyunundan və futbolçuların nümayiş etdirdiyi əzmkarlıqdan razı qaldığını bildirib. O, həmçinin komandada qurmaq istədiyi oyun sistemi və oyunçuların motivasiyası barədə sualları cavablandırıb:

"Yaxşı oynadıq və istədiyimiz üç xalı qazandıq. Futbolçularım döyüşürdülər, qələbə üçün hər şeyi etdilər. Görmək istədiklərimizi gördük, futbolçuların istəyi var idi. Aydın idi ki, hamı bu gün can yandırırdı. Öyrənməli olduğumuz nüanslar hələ də var ki, üzərində işləməliyik".

Sistem və psixoloji durumla bağlı A.Demçenko komandadakı atmosferin müsbət olduğunu vurğulayıb:

"Biz sistem üzərində çalışırıq. Vacib olan odur ki, futbolçularda istəyi gördük. Futbolçuların hamısı motivasiyalıdır, özgüvənləri yerindədir".