"Oyunu yaxşı analiz etmişdik və bura 3 xal üçün gəlmişdik. Şükürlər olsun ki, istəyimiz baş verdi. Bu qələbəni Mozesə həsr edirik. O, 3 gün əvvəl atasını itirsə də, böyük xarakter göstərərək matçda iştirak etdi və qələbəmizdə pay sahibi oldu. Standart vəziyyətlər üzərində çox işləyirik, qolu da məhz belə epizoddan vurduq. İkinci hissədə rəqib daha yaxşı oynasa da, müdafiədə uğurlu çıxış edərək nəticəni qoruya bildik".

Futbolmedia.az xəbər verir ki, bu sözləri "İmişli"nin baş məşqçisi Jorj Kaşkilya Misli Premyer Liqasının 28-ci turu çərçivəsində səfərdə "Kəpəz" üzərində qazandıqları qələbəni (1:0) şərh edərkən bildirib. Baş məşqçi növbəti mövsümdə komandadan ayrılacağı ilə bağlı yayılan xəbərlərə belə aydınlıq gətirib:

"Hazırda bütün diqqətimiz bu mövsümün məqsədinə yönəlib. Əsas hədəfimiz Premyer Liqada qalmağı tam təmin etməkdir. Şanslarımız çox olsa da, hələ 100 faiz məqsədimizə çatmamışıq. Danışıqlar yalnız mövsüm bitdikdən sonra ola bilər".

Mütəxəssis uzunmüddətli zədədən qayıdan Vüsal Qənbərovun vəziyyəti və heyətə inteqrasiyası barədə məlumat verib:

"Vüsal zədəsini tam sağaltsa da, 3-4 ay futboldan uzaq qaldığı üçün onu tədricən hazırlamalıyıq. Bu proses yavaş-yavaş baş verməlidir. Növbəti matçlarda onun oyun vaxtının artacağını gözləmək olar".

Baş məşqçi mövsümün əvvəlində komandaya qarşı olan bədbin proqnozlar və qazanılan uğurlu nəticələr barədə fikirlərini bölüşüb:

"Çətinliklər və ağır şərtlər komandanın əsl xarakterini üzə çıxardı. Biz mövsümün əvvəlində bu kollektivin gücünə inanırdıq. 1-ci Liqadan yeni yüksələn komanda üçün ilk ildə bu qədər xal toplamaq zarafat deyil. Bu çətinliklər "İmişli"ni daha da formalaşdırdı və gücləndirdi".