“İmişli”nin baş məşqçisi Jorj Kaşkilya Misli Premyer Liqasının 8-ci turunda evdə “Qəbələ” ilə heç-heçə (2:2) etdikləri görüşü şərh edib.

Futbolmedia.az xəbər verir ki, portuqaliyalı mütəxəssis qarşılaşmanın çətin keçdiyini bildirib:

“Ağır oyun oldu. “Qəbələ” çox güclü komandadır və meydanda bərabər mübarizə getdi. Birinci hissənin sonunda və ikinci hissənin əvvəlində buraxdığımız qollar vəziyyəti çətinləşdirdi. Amma sonradan taktiki dəyişikliklər etdik və komanda toparlandı. Futbolçular xarakter göstərdilər. 0:2 hesabından sonra 1 xal qazanmaq pis nəticə deyil”.

Son matçlarda çox qol buraxmalarına münasibət bildirən Kaşkilya bunun müdafiə xətti ilə bağlı olmadığını deyib:

“Müdafiəmizdə ciddi problem yoxdur. Sadəcə, rəqiblər çox güclüdür. Qol vurmaq da, qol buraxmaq da futbolun tərkib hissəsidir. ‘Qəbələ’nin hücumçuları sürətlidir, bu da təzyiq yaradır. Təbii ki, qol buraxmaq istəmirik, amma rəqiblərin gücünü də nəzərə almaq lazımdır.”

Baş məşqçiyə komandasının feyr-pley qaydalarına əməl etmədiyi epizod xatırladılıb. O isə vəziyyəti belə izah edib:

“Rəqib futbolçunun zədələndiyini görmədik. Sadəcə, eşitdik ki, baş məşqçi əvəzləmə etmək istəyir. Buna görə də epizoda həmin şəkildə reaksiya verdik”.