Yaxın günlərdə “Qarabağ” klubunun ev oyunlarını keçirdiyi “Azərsun Arena”nın meydançasında əsaslı yenidənqurma işlərinə başlanacaq. Bu barədə klub qərar verib.

Futbolmedia.az xəbər verir ki, əsas komandanın ev oyunlarını keçirdiyi meydançanın ot örtüyü dəyişdiriləcək. İndiki təbii ot örtüyü ən son standartlara cavab verən hibrid meydança ilə əvəzlənəcək.

Bu o deməkdir ki, meydançanın örtüyünün çox hissəsi təbii, çox az bir hissəsi isə süni olacaq.

Aparılacaq işlərlə əlaqədar meydança ən azı bu mövsümün sonunadək bağlı olacaq. Bu səbəbdən “Qarabağ” ev oyunlarını indi olduğu kimi Tofiq Bəhramov adına Respublika stadionunda keçirəcək.