Memfis Depayın pasportu Braziliyada oğurlanıb.

Futbolmedia.az xəbər verir ki, 31 yaşlı “Korintians” hücumçusu Niderland millisinin düşərgəsinə gəlməli idi, lakin hələ bunu edə bilməyib. Niderland yığmasının tarixində ən məhsuldar futbolçu Reuters-ə bildirib ki, pasportu Braziliyada oğurlanıb.

Nəticədə Depay 9 oktyabrda keçiriləcək 2026-cı il Dünya Çempionatının seçmə mərhələsi çərçivəsində Malta ilə səfər oyununu buraxacaq. 12 oktyabrda isə evdə Finlandiya ilə qarşılaşma olacaq.

Niderland Krallıq Futbol Assosiasiyası (KNVB) açıqlayıb ki, Depay “mümkün olan ən qısa zamanda komandaya qoşulmaq üçün bütün imkanlardan istifadə edir”.

Milli komandanın baş məşqçisi Ronald Kuman əlavə edib:

“Bu, öncəliklə Memfis üçün xoşagəlməzdir, amma biz də eyni vəziyyətdəyik. Təbii ki, hazırlıqları tam heyətlə başlamaq istəyirik.
Lakin bu, bizim nəzarətimizdən asılı olmayan bir haldır. Ümid edirik ki, o, ən qısa zamanda komandaya qoşula biləcək.”