"Qəbələ"nin baş məşqçisi Kaxaber Tsxadadze Misli Premyer Liqasının 3-cü turunda "Araz-Naxçıvan"a 1:2 hesabı ilə uduzduqları matçı şərh edib.

Futbolmedia.az klubun mətbuat xidmətinə istinadən xəbər verir ki, mütəxəssis səhvlərdən nəticə çıxaracaqlarını deyib:

“Əvvəlcə “Qarabağ”ı və keçmiş komandam “Kayrat”ı Çempionlar Liqasının liqa mərhələsinə vəsiqə qazanmaları münasibəti ilə təbrik edirəm. Oyuna gəlincə, rəqib yaxşı futbolçulardan təşkil olunmuş komandadır. Bu mövsüm avrokuboklarda çıxış etdilər. Artıq 3-cü oyundur ki, qol vurduğumuz matçda üstünlüyü qoruyub saxlaya bilmirik. Bu, bir çox futbolçularımızın təcrübəsinin olmaması ilə əlaqədardır. Amma məndə geri çəkilmək yoxdur. Çatışmayan cəhətlərimiz üzərində çalışacağıq”.