"Şamaxı"nın baş məşqçisi Ayxan Abbasov Misli Premyer Liqasının 2-ci turunda "Sabah"a 1:2 hesabı ilə uduzduqları oyunu şərh edib.

Futbolmedia.az xəbər verir ki, o, matçdan sonra keçirilən mətbuat konfransında deyib:

- Çətin oyun olacağını bilirdik. "Sabah" avrokuboklarda yaxşı oyunlar keçirmişdi. Bizdən daha yaxşı formadadırlar. İkinci rəsmi oyunumuz idi. Matça pis başladıq. İlk 10-15 dəqiqəni çıxsaq, oyunu bərabərləşdirə bildik. Epizodlar oldu. Dəyərləndirə bilərdik. Bərabərlik qolundan sonra bizim yaxşı fürsətimiz oldu. Amma istifadə edə bilmədik. Əvəzində rəqib standart vəziyyətdən fərqləndi. Futbolçuların "Sabah"a qarşı belə inamlı oynamasını istəyirdik. Məncə, pis alınmadı. İstəyərdik ki, bu gün ən azı 1 xal qazanaq. Buna layiq idik. Çempionat uzun marafondur. Bu gün oyuna 2 itki ilə çıxmışdıq. Bunun təsiri oldu. Növbəti turda ağır "Sumqayıt" səfərinə gedəcəyik. Vaxt da azdır. Həmin matça tam köklənməliyik.

- Birinci qolda qapıçının səhvinin olduğunu düşünürsünüz?

- Xeyr. Qapıçı üçün çətin top idi. İrəlidə mövqe səhvi etdik. Mərkəz müdafiəçimiz asmadan sonra topa çatmalı idi. Elə böyük təhlükə yox idi. İlk dəqiqədə vurulan qoldan sonra rəqibə inam gəldi. Birinci qol bu gün bizim məğlubiyyətimizə səbəb oldu.

- "Sabah" 4 ilə yaxındır Şamaxı səfərində qələbə qazana bilmirdi. Bu gün sizin xal qazanmağınız üçün nə çatmadı?

- Bəxt deməyim, oyun şansı "Sabah"ın tərəfində idi. Bizim standart vəziyyətdə Kərim 1 metrdən topu əyri vurur. Amma onlar eyni vəziyyətdən qapıya düşür. Rəqib də hücum etdi, biz də. Deyə bilmərik ki, bu gün futbolçularımız zəif çıxış etdi. Bəli, qələbə qazanmaq üçün daha yaxşı olmalıyıq. Futbol şans "Sabah" tərəfdə idi.

- Edqar Ədilxanov əvvəlki performansını göstərə bilmir. Nə baş verib?

- Edqar ötən oyunda əsas heyətdə olmadığı üçün çox suallar olmuşdu. Həmişə deyirəm, bu oyunçuların keçid dövrü var. Edqar hərtərəfli basqıya hazır olmalıdır. Beynəlxalq oyunlara çıxmalıdırlar. Qarşıda U-21 millisinin oyunları gəlir. Ondan sonra daha möhkəm ola bilər. Bəli, Edqardan tam razı deyildik. Bu gün nəsə etmək istədi. İnşallah formaya düşəcək. Özü ilə fərdi söhbət edirəm. Cavanlara dəstək lazımdır.

- İkinci hissədə Rossiyə qarşı çəkmə var idi. Sonradan həmin epizoda baxdınız?

- Bu gün bütün cərimələr bizim tərəfə idi. Zarafatla dedim ki, əvvəl səfər matçlarında top göydə olanda oyunu saxlayırdılar. Bu gün elə itələmələr var idi ki, 100 dənə kadr yığaram. İki oyundur hakimlərin simpatiyası rəqiblərə olur. Bəlkə də rəqiblərin adlarıdır. Sanki bu gün səfərdə oynayırdıq. Hakimlər bizə öyrədir ki, bir az da möhkəm olmaq lazımdır.

- Ötən mövsüm Azərbaycan Kubokunda “Neftçi” – “Sabah” oyununda Rauf Allahverdiyev səhv etmişdi və hakimlikdən uzaqlaşdırıldı. Sizcə, indi digər hakimlər üzərində də təzyiq var?

- Bunu hakimlərdən soruşmaq lazımdır. Onsuz da hakimlərə həmişə təzyiq olacaq. Biz onların üzərinə çox da getmirik. Bizim hakimlər o qədər də zəif deyillər. İstəyirik ki, kiçik cərimələrə görə oyun dayanmasın, oynamağa imkan versinlər. Hakimlərə heç nəyi sübut etmək olmur. Bunları yol polisləri ilə müqayisə edirəm. Biz nə etsək də, səhvik.

- Yayda düşərgənizdə Raul Hacıyev baxışda olub. Gürcüstan vətəndaşı idi, amma sonra qalmadı. AFFA bu məsələdə sizə nəsə köməklik edir? Onu U-21-in növbəti toplanışında görəcəyik?

- Perspektivli futbolçudur. Bir az vaxt lazımdır. Bəzi məsələlər var, qanunlar var.