"Futbolçularımı təbrik edirəm. Çox vacib qələbə idi. Rəqib bu stadionda oynamaq bizim üçün gərginlik yarada bilərdi. 3:0 hesablı qələbə qazansaq da, bu, o demək deyil ki, onlardan çox üstün idik. Cavab oyununa hazırlaşmağımız vacib olacaq. 3:0 hesabını unutmalı və Bakıdakı matçda daha ciddi olmağımız lazımdır. Azsaylı azarkeşlərimiz var idi, onların hər birinə təşəkkür edirəm. Rəqibə də qarşıdakı oyunlarda uğurlar arzu edirəm".

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov Çempionlar Liqasının 2-ci təsnifat mərhələsinin ilk oyunları çərçivəsində İrlandiyada "Şelburn"a qalib gəldikləri (3:0) matçdan sonra deyib. O, mətbuat konfransında jurnalistlərin suallarını cavablandırıb.

- Cütün taleyi həll olundu?

- Qətiyyən yox. Tam yanlış fikirdir. Bu rəqib məğlub olmağı xoşlamır. "Şelburn" meydanda nə etdiyini bilən komandadır. Ona görə də Bakıdakı matçda burdakından daha diqqətli olmalıyıq.

- Rəqibin təzyiqi zamanı oyun üslubunu dəyişməyi planlaşdırırsınız?

- Xeyr. Rəqib təzyiq göstərirsə, oynamaq asan olmur. Səfərdə oynayırıq və belə termin yoxdur ki, rəqib təzyiq göstərəndə qeyri-adi nəsə edək. Əksinə, rəqibə uyğun oyunumuzu qururuq. Sadəcə ilk oyunumuzdur. İnanıram ki, qarşıdakı matçlarda daha yaxşı olacağıq. Bəlkə də rəqib bizə uyğun olmayan sürətlə, üslubda oynayırdı. Biz meydançada yerləşənə kimi 1-2 ötürmə ilə hücuma çıxa bilirdilər. Müdafiəçilərimiz bərk durdular, rəqibin hücumçularına imkan vermədilər. Bu oyunda həddindən artıq riskə getməli deyildik.

- Daha əvvəl İrlandiyada “Dandalk”la qarşılaşmışdınız. Keçmişdəki oyundan hansısa dərs çıxarmışdınız?

- Futbol gündən-günə dəyişir. Geriyə baxsaq, gələcəkdə uduza bilərik. Ona görə də bu gün üçün hazırlaşırıq. Rəqibə uyğun hazırlaşmışdıq. Amma hər iki matçda – həm bu, həm də “Dandalk”la görüşdə gərgin dəqiqələr oldu. Bu da normaldır. İndi hamı düzgün hücum qurmağı, müdafiə olunmağı bacarır. Komandalar keyfiyyətlərini artırırlar. Belə oyunlar bizimçün əlavə təcrübə olur.