"Əl-Şəbab"ın türk baş məşqçisi Fatih Terim Səudiyyə Ərəbistanı çempionatının 14-cü turunda "Əl-Əhli"yə uduzduqları (2:3) matç haqqında danışıb.

Futbolmedia.az xəbər verir ki, həmin görüş Terimin ölkə çempionatında ilk oyunu olub. Oyunun ilk 13 dəqiqəsi ərzində Terimin komandası 0:2 hesabı ilə geri düşüb.

Mütəxəssis isə qarşılaşmanın onu təccübləndirdiyini bildirib: "Baş məşqçilik karyeram ərzində çox təcrübəm olub. Amma belə oyun görməmişdim. İlk 60 dəqiqə ərzində mübarizə apardıq. Amma 3-dən çox qol buraxa bilərdik. Bəlkə də sonda hesabı bərabərləşdirə də bilərdik. Amma bu, mənim düşüncəmi dəyişdirməzdi. Çünki həm fərdi, həm də kollektiv şəkildə səhvlərimiz oldu".

O, Səudiyyə Ərəbistanı Kral Kubokunun yarımfinalında "Əl-İttihad"a qarşı keçirəcəkləri görüş (1 aprel), həmçinin transfer məsələləri haqqında da danışıb: "Yarımfinal oyununadək kifayət qədər vaxtımız var. Klub rəhbərliyi ilə iclaslarda oluruq. Qış transfer pəncərəsi ilə əlaqədar danışırıq. Daha çox işləməyə, dəyişikliklərə ehtiyacımız var. Lazım gəlsə, yeni futbolçular da transfer etməliyik".

Qeyd edək ki, "Əl-Şəbab" bundan əvvəl Terimin rəhbərliyi altında iki oyuna çıxıb. "Damac"a qarşı yoxlama matçında 4:1 hesablı qələbə qazanan kollektiv Səudiyyə Ərəbistanı Kral Kubokunun 1/4 finalında da "Əl-Fayha" qalib gəlmişdi (2:1).