"Neftçi"dən Türkiyənin "Bursaspor" klubuna keçən millimizin üzvü Namiq Ələskərovun yeni komandasında debütü ləngiyir.

Futbolmedia.az xəbər verir ki, o, Türkiyə 1-ci liqasının 2-ci turunun bugünkü oyununu da buraxacaq. Buna səbəb Bursa təmsilçisinin 26 yaşlı yarımmüdafiəçini sifariş edə bilməməsidir.

Namiq "Erzurumspor"la matç üçün səfərə aparılsa da, meydana çıxa bilməyəcək. Bu gün keçiriləcək qarşılaşma Bakı vaxtı ilə saat 20:15-də başlayacaq.

"Neftçi"nin mətbuat xidmətindən "Report"a verilən açıqlamada da Ələskərovun transfer vərəqəsinin qarşı tərəfə verilmədiyi təsdiqlənib.

Qeyd edək ki, Namiq Ələskərov "Bursaspor"la 2 illik müqavilə imzalayıb.