“Mən Azərbaycanda fəaliyyətimi başa vurmuşam. Amma dərhal da hər şeyi təzədən başlayıb yeni bir proyekt üzərində işləmək istərdim”.

Futbolmedia.az xəbər verir ki, bu sözləri Azərbaycan millisinin sabiq baş məşqçisi Canni de Byazi İtaliyanın “Tutto Udinese” nəşrinə verdiyi müsahibədə bildirib.

67 yaşlı mütəxəssis Azərbaycan millisindəki 3 illik fəaliyyəti barədə danışarkən deyib: “Düşünürəm ki, bu il 3 ildə Azərbaycanda futbolun inkişafına çox şey verdim. Mən yaranan əlaqəyə görə təəssüflənirəm. Amma hər şey sona çatıb. Fəxr edirəm ki, komanda inanılmaz inkişafa nail oldu və Azərbaycan futbolu üçün tarixi nəticələr qazandı. Bizim 5 ardıcıl qələbəmiz oldu ki, əvvəl belə şey baş verməmişdi. Biz Avropa təsnifat mərhələsində 5 komandalı qrupda 7 xal topladıq. Böyük komandalarla bərabər səviyyədə oynadıq. Belçika ilə ilk görüşdə yalnız epizodlara görə uduzduq. Avstriya ilə matçda isə hətta heç-heçəyə layiq idik. İsveç üzərindəki qələbə isə tarixə düşəcək. Heç vaxt həmin komandaya 3:0 hesabı ilə qalib gələcəyimizi düşünməzdim. Maraqlı futbolçular toplamışdıq. Yolun təməli qoyulub və mən ümid edirəm ki, inkişaf gələcək illərdə daha da böyüməyə başlayacaq”.

De Byazi öz fəaliyyətindən razılığını ifadə edib: “Mən əlbəttə nümayiş etdirdim ki, futbolu hətta az resurslar olanda da oynamaq olar. Azərbaycan kimi milli komandanı çalışdırmaq dildən başlamış bir çox başqa səbəbə görə sadə iş deyil. Əlimdə olan materialla mümkün qədər çox iş görməyə çalışaraq xüsusi bir dövr yaşadım”.

O, gələcək fəaliyyəti ilə bağlı suala cavab olaraq deyib: “Digər bir yerdə dərhal yenə baş məşqçi işləməyə bilərəm. Mənə yüksək səviyyədə mübarizə aparmağa imkan verəcək bir neçə komandadan vacib təklif gəlib. Amma hələlik müqavilə bağlamadığıma görə nəsə danışmaq uyğun deyil”.