"Komandam yaxşı çıxış etdi. Aqressiv idik. Məni sevindirən odur ki, çoxlu qol eizodları yaratdıq, Qələbəyə layiq idik".

Futbolmedia.az xəbər verir ki, bu sözləri "Neftçi"nin baş məşqçisi Adrian Mutu Misli Premyer Liqasının 12-ci turunda bu gün səfərdə "Qəbələ"yə qalib gəldikləri oyunundan (2:0) sonra keçirilmiş mətbuat konfransında deyib.

Rumıniyalı mütəxəssis Qəbələdəki futbol infrastrukturu ilə bağlı danışıb: "Bura mənim üçün tanışdır. Bir neçə gün Qəbələdə qalmışıq. Hər şey çox yaxşıdır, klubun yaxşı infrastrukturu var. Qəbələ şəhəri də xoşuma gəlir".

Mutu "Neftçi"nin qol vurmaqda çətinlik çəkməsi ilə bağlı sualı da cavablandırıb: "Bəli, çoxlu epizodlar yaradırıq. Rəqib qapısı qarşısında daha diqqətli olmalıyıq. Bunu həll etməyin yolu çox çalışmaqdır. Zamanla aradan qaldıracağıq".

Adrian Mutu zədələnərək əvəzlənən futbolçusu Aaron Olanarenin durumu haqda deyib: "Əzələ problemi idi. Ümid edirəm ki, ciddi zədə almaz. Tez-tez meydança dəyişəndə belə hallar olur. Bəzən süni örtükdə oynayırıq, bəzən təbii örtükdə. Hər yerdə Qəbələdəki kimi meydançalar olsa, mükəmməl alınardı".

Mutu "Qışda hücumçu transferi istəyəcəksiz?" sualını belə cavablandırıb: "İndi bu haqda danışmaq düzgün deyil. Komandanı təhlil edəcəyik. Oyunçulardan tələblərimiz yüksəkdir. Çünki, böyük klubuq. Onlar "Neftçi"nin səviyyəsində oynamalıdırlar".