Ukrayna "Şaxtyor" klubu Rusiyaya qaçan Aleksandr Rosputko ilə müqaviləyə xitam verib.

Futbolmedia.az xəbər verir ki, bu barədə klubun saytı məlumat yayıb. Belçikada UEFA Gənclər Liqası matçından sonra futbolçu icazəsiz Ukraynaya qayıtmayıb. Sonradan məlum olub ki, Rosputkon Rusiyaya gedib.

"Komandanın olduğu yerə qayıtmaması və müqavilə üzrə öhdəlikləri yerinə yetirməkdən faktiki imtina etməsi səbəbindən “Şaxtyor” futbolçusu Aleksandr Rosputko ilə müqaviləyə xitam verib” - deyə məlumatda qeyd olunub.

Xatırladaq ki, daha əvvəl Ukrayna mətbuatında Rosputkonun Rusiyaya qaçması ilə bağlı iki versiya yayılmışdı. Birinci versiya odur ki, oyunçu Rusiyayönümlü fikirlərə sadiqdir, bunun fonunda komanda yoldaşları ilə münaqişələri olub. İkinci versiyaya görə, Rosputko sadəcə olaraq “Şaxtyor”la yeni müqavilə ilə razılaşa bilməyib. Oyunçunun klubla əvvəlki müqaviləsi mövsümün sonuna qədər qüvvədə idi və Rosputko onun az maaş aldığını düşünürdü.

Xatırladaq ki, ötən ilin fevralında Rusiya Ukraynaya silahlı müdaxilə edib. Hazırda iki ölkə arasında müharibə davam edir.