UEFA prezidenti Aleksander Çeferin Avropa Superliqasının yaradıcıları haqqında danışıb.

Futbolmedia.az saytı Avropa mətbuatına istinadən xəbər verir ki, o, əsas təsisçilər "Yuventus", "Real" və "Barselona"nı vicdansızlıqda ittiham edib:

“Bu layihə hələ də yalnız qəzetlərdə dərc olunan məqalələr və müəyyən maraqlı tərəflərin eqoları naminə inkişaf mərhələsindədir. UEFA ilə danışıqlar olacağı təqdirdə mövqelərini gücləndirmək üçün nəsə etməyə çalışırlar, amma başa düşmürdülər ki, müzakirə olunacaq bir şey yoxdur. Bu, vicdansızlıqdır.

Qeyd edim ki, bütövlükdə klublara və Superliqanın yaradılmasında iştirak edən hər kəsə hörmətim var. Klub rəhbərliyi səhv qərarlar qəbul edərsə, bu o demək deyil ki, mən bütövlükdə bu klubların əleyhinə olacağam.

Maraqlısı budur ki, futbolun xilaskarı olduqlarını iddia edən 3 klubdan biri büdcə ilə saxtakarlıq, digəri isə hakimlər komitəsinin rəhbərlərindən birinə pul köçürmələri ilə bağlı ittiham irəli sürülüb. Görək 3-cü klubla bağlı nəsə olacaqmı? Onların futbolu necə xilas edəcəklərini görmək maraqlıdır”.

Xatırladaq ki, 2021-ci ildə aprelin 18-də “Mançester Yunayted”, “Mançester Siti”, “Arsenal”, “Liverpul”, “Tottenhem”, “Çelsi” (hamısı İngiltərə), “Real", “Barselona”, “Atletiko” (hamısı İspaniya), “Yuventus”, “Milan” və “İnter” (hamısı İtaliya) klubları Avropa Superliqasını yaratdıqlarını açıqlamışdılar. UEFA-nın xəbərdarlığından sonra "Real", "Barselona" və "Yuventus"dan başqa digər klubun turniri tərk etməsi ilə Avropa Superliqası layihəsinin başlaması təxirə salınıb. Lakin bir müddət əvvəl yenidən sözgedən klublar layihəni gündəmə gətiriblər. Daha sonra "Yuventus"un maliyyə saxtakarlığı etməsi, "Barselona"nın isə keçmiş hakimlər komitəsinin sədrinə rüşvət ödəməsi ilə bağlı ittiham irəli sürülüb.