"Barselona"nın baş məşqçisi Xavi Çempionlar Liqasının qrup mərhələsinin 5-ci turunda "Bavariya"ya uduzduqları matç (0:3) barədə danışıb.

Futbolmedia.az "Marca"ya istinadən xəbər verir ki, ÇL-də qrupda qaldığı dəqiqləşən komandanın 42 yaşlı çalışdırıcısı Münhen təmsilçisinin onlardan daha yaxşı səviyyəyə malik olduğunu deyib:

"Bavariya" bizdən daha yaxşı idi, bununla bağlı heç nə deyə bilmərik. Bu, indi bizim reallığımızdır. Çempionlar Liqasını unudub, başqa turnirlərə keçməliyik. Bu gün "Bavariya"nın səviyyəsinə çata bilmədik. Münhendə biz daha fəal idik, amma bu gün onlar daha yaxşı və aqressiv oynadılar. Sabah məşq edib çempionat haqqında düşünəcəyik. Çoxlu gözləntilər var idi, biz çətin qrupa düşdük".

Mütəxəssis qrupda qalmaları ilə bağlı isə bunları söyləyib: “Futbol bizə qarşı qəddar idi. Başqa ağır günlərdə döyüşürdük, amma burada yox. Mövsüm oktyabrda başa çatmır. Hələ uğrunda mübarizə aparacağımız kuboklar var. Birlik olmalıyıq. Bu, Çempionlar Liqasını tərk etmək üçün qəddar bir yoldur. Lakin digər oyunlarımızı təhlil etsəniz, görərsiniz ki, biz turnirdə daha çox şeyə layiq idik”.

Qeyd edək ki, C qrupunda sona 1 tur qalmış ötən gecə "İnter" "Viktoriya"nı məğlub edib - 4:0. Nəticədə "Bavariya"dan sonra Milan təmsilçisi də pley-offa vəsiqə qazanıb. "Barselona" qrup 3-cüsü kimi yoluna Avropa Liqasında davam edəcək. "Viktoriya" isə sonuncudur.