"Barselona"nın baş məşqçisi Xavi Çempionlar Liqasının qrup mərhələsində "İnter"lə ötən gecə keçirilən oyunun hakimliyindən narazı qalıb.

Futbolmedia.az “Marca”ya istinadən xəbər verir ki, o, 0:1 hesabı ilə uduzduqları matçdan sonra keçirilən mətbuat konfransında baş hakim Slavko Vinçiçin qərarından qəzəbləndiyini deyib.

Oyunun 90-cı dəqiqəsində cinahdan ötürülən top öz cərimə meydançasında olan “İnter”in müdafiəçisi Denzel Dumfrisin əlinə dəyib. Videotəkrarına baxdıqdan sonra penalti təyin edilməyib.

Xavi sloveniyalı referinin bu qərarına belə şərh verb: “Mən qəzəblənirəm. Çünki bu, indi yaşamamalı olduğumuz ədalətsizlikdir. Hakim özü izahat verməli olacaq. İnanıram ki, əllə oyun var idi. Hakimlər futbolda mühüm rol oynayırlar və buna görə də qərarlarını izah etməlidirlər. Amma Vinçiç mənə heç nə demək istəmirdi”.

Qarşıdakı 3 oyunun final matçı kimi olacağını bildirən Xavi çətin vəziyyətdə olduqlarını qeyd edib: “Çox ciddi məğlubiyyət aldıq. İndi çox xoşagəlməz vəziyyətdəyik. Qarşıda üç final var.

Bu, Çempionlar Liqasıdır, biz daha yaxşı oynamalıyıq. Daha çox şans yaratdıq, amma rəqib çox yaxşı müdafiə olundu. Bu məğlubiyyət məni narahat edir, vəziyyət çətindir”.

Qeyd edək ki, görüşün 66-cı dəqiqəsində VAR-a baxıldıqdan sonra "Barselona"nın qolu ləğv edilib.