"Tottenhem"in baş məşqçisi Antonio Konte İngiltərə Premyer Liqasının 2-ci turunda "Çelsi" ilə ötən gün keçirilən oyundan sonra rəqib komandanın baş məşqçisi Tomas Tuxellə arasında yaşanan münaqişə haqda danışıb.

Futbolmedia.az xəbər verir ki, italyan mütəxəssis matçdan sonra keçirilən mətbuat konfransında bildirib ki, bu, onların arasında olan məsələdir və əsas müzakirə oyun ətrafında olmalıdır:

“Məncə, oyun haqda danışmaq daha yaxşıdır. Maraqlı və hər iki komanda üçün çətin matç oldu. Yenə deyirəm, vəziyyəti şərh etmək istəmirəm. Çünki bu, ən vacib məsələ deyil, bu, mənimlə onun arasında olan problemdir. Bu vəziyyət haqqında deyil, oyun haqqında danışın, biz futbol haqqında danışmaq üçün buradayıq".

Xatırladaq ki, 2:2 hesabı ilə başa çatan görüşdə baş məşqçilər arasında 2 dəfə gərginlik olub. Matçın final fitindən sonra isə görüşən zaman Tuhel Kontenin əlini buraxmayıb. Bu isə Kontenin xoşuna gəlməyib və onların arasında yenidən insident yaşanıb.