"Nəticə “Qəbələ” ilə oyunun nə qədər çətin keçdiyini göstərməyə bilər. Birinci hissə istədiyimiz kimi getmədi, çoxlu top itirdik, rəqibimiz isə aqressiv futbol oynadı, əks-hücumları təhlükəli idi”.

Futbolmedia.az xəbər verir ki, bu sözləri "Fehervar"ın futbolçusu Kenan Kodro Konfrans Liqasının 2-ci təsnifat mərhələsinin “Qəbələ” ilə ilk matçından sonra deyib.

Oyunda dubl edən hücumçu klubun rəsmi saytına açıqlamasında evdə 3:0 hesabı ilə qalib gəlmələrinə baxmayaraq, səfərə də ancaq qələbə üçün gələcəklərini bildirib: “İkinci hissədə xeyli kompakt oynadıq, çoxlu qol imkanları yaratdıq və üç qol vurduq. Bu hesab bizi inamlı edir. Ancaq hələ növbəti mərhələyə çıxmamışıq. Futbolda hər şey ola bilər. Ona görə də qalib gəlmək niyyəti ilə gələn həftə Azərbaycana səfər edəcəyik”.

Qeyd edək ki, komandalar arasındakı cavab oyunu iyulun 28-də Qəbələ şəhər stadionunda olacaq.