“Əsl kubok qarşıdurması idi. İkinci hissədə çoxlu qol imkanları yaratdıq”.

Futbolmedia.az xəbər verir ki, bu sözləri “Sumqayıt”ın baş məşqçisi Aleksey Baqa Azərbaycan kubokunun 1/4 finalının “Qəbələ” ilə cavab matçından sonra keçirilən mətbuat konfransında deyib.

Belaruslu mütəxəssis 1:1 hesablı heç-heçə etdikləri matçı belə şərh edib: “Komandam son dəqiqəyə qədər mübarizə apardı. Nəticə əldə etməsək də, inanıram ki, oyunumuzda müsbət cəhətlər var. Ancaq daha çox işləməliyik”.

Baqa “Mövsümün sonuna qədər komandanın qarşısına hansı hədəflər qoyulub “ sualını cavablandırıb: “Məqsəd eynidir - hər oyun bizim üçün final kimidir. Biz hamımız peşəkarıq və mövsümün sonuna qədər üzərimizə düşən vəzifələri yerinə yetirəcəyik”.

Aleksey Baqa Qəbələnin təbiətinə heyran olduğunu da deyib: “Dünən məşqdən sonra gəzintiyə çıxdım. Stadionun kənarında tarlalar, dağlar - bir sözlə, fantastikdir”.