"Gərgin oyun alındı. Hiss olunurdu ki, “Qəbələ” kubok oyununa çox ciddi hazırlaşıb. Ümumiyyətlə, bu komanda kubok matçlarında öndə gedənlərdəndir, çox vaxtı finala çıxıb. İlk dəqiqələrdən oyunu ələ ala bilmədik. Amma get-gedə futbolçular tapşırıqlarımızı yerinə yetirməyə çalışdı. Bir neçə qol epizodumuz da oldu. Amma qollar sonda gəldi".

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov Azərbaycan kubokunun yarımfinalında səfərdə "Qəbələ"yə 3:1 hesabı ilə qalib gəldikləri ilk oyundan sonra keçirilən mətbuat konfransında deyib.

"Bura dünən gəlmişik. Adaptasiya olmaq futbolçular üçün bir o qədər də asan deyildi. Hər bir halda futbolçularımdan razı qaldım. Vacib qələbə qazandıq. Bu oyun göstərdi ki, qarşıdakı çempionat oyununa çox ciddi hazırlaşmalıyıq. Bütün diqqətimiz bu oyunda olacaq. "Qəbələ”yə də uğurlar arzulayıram" - deyə o bildirib.

Q.Qurbanovun sözlərinə görə, oynadıqları turnirlərdə hər il maksimum nəticə göstərmək istəyirlər: " Son neçə ildə bu alınmırdı. Bu mövsüm şansımız var, bundan istifadə etməyə çalışacağıq. Qarşıda hələ cavab oyunu var, çempionat da davam edir. Bəli, şanslarımız var. Bu il hər iki turnirin qalibi olsaq, buna sevinərik. Bunu nə dərəcədə bacaracağıq, qarşıdakı oyunlar göstərəcək”.

Qurbanov son zamanlar Patrik Andradenin klubdan böyük məbləğ tələb etməsi xəbərlərinə isə bu cür münasibət bildirib: "Patriklə danışıqlar gedir. Onun klubla iyunda müqavilə bitir. Hər bir futbolçu öz oyununu yaxşılaşdırdığı kimi, yaşam tərzini də yaxşılaşdırmaq istəyir. Ona görə də bu məsələyə normal yanaşıram. Ola bilər ki, daha çox üzdə olub, təklifləri çoxdur. Belə düşüncəsi ola bilər. Hər halda burada qlobal problem görmürəm. Onunla dost kimi danışıq gedir. Düşünürəm ki, yaxşı olar. Hər zaman çalışırıq ki, kim nəyə layiqdirsə ona qarşılığını verək. Neçə illərdi bu işin içindəyəm və siz deyən məsələyə pis baxmıram".