Premyer Liqamızda başa çatan 2020/21 mövsümündə cəmi 2 futbolçu bütün 28 turda meydanda olub. Futbolmedia.Az xəbər verir ki, bunlar "Səbail"in müdafiəçisi Turan Manafovla "Zirə"nin mozambikli yarımmüdafiəçisi Klesio Baukdu. 

Onlardan dəqiqə sayında üstünlük Turandadı. Belə ki, çempionatı son pillədə başa vuran komandanın 23 yaşlı sol cinah müdafiəçisi 2490 dəqiqə meydanda olub. Bütün çempionat boyu əsas heyətdə meydana çıxan Manafov yalnız bir dəfə - V turda "Sumqayıt"la səfər matçında (2:1) 60-cı dəqiqədə əvəzlənib. Yəni, həmin 30 dəqiqə olsaydı, o, əvəzolunmaz yeganə futbolçu olacaqdı.

2257 dəqiqə çıxış edən Klesionun isə Turandan fərqli sonradan meydana çıxması da olub. "Neftçi"nin qapıçısı Aqil Məmmədov 27 turu əvəzolunmadan keçirərək 2430 dəqiqə oynayıb. Göründüyü kimi, o, dəqiqə sayında Bauku qabaqlayır. Aqil yalnız bir turda - "Qəbələ"ylə səfər matçında (2:2) çıxış etməyib. 

Son çempionatda ümumilikdə 209 futbolçu iştirak edib. Onlardan 9-u iki klubda oynayıb. Bunlar müdafiəçilər Ali Sisey ("Zirə" - "Səbail"), Qismət Alıyev ("Qəbələ" - "Zirə"), Arsen Ağcabəyov ("Səbail" - "Sabah"), Bahadur Həziyev ("Səbail" - "Keşlə"), Cabir Əmirli ("Neftçi" - "Sumqayıt"), yarımmüdafiəçilər Cavid İmamverdiyev ("Keşlə" - "Sumqayıt"), Dimitro Klots ("Keşlə" - "Sabah"), "Yevgeni Koçuk ("Sabah" - "Keşlə") və hücumçu Musa Qurbanlıdı ("Qarabağ" - "Zirə")

Hamıdan çox futbolçudan istifadə edən "Sabah"dı - 32. Ən az oyunçuya isə “Qarabağ” güvənib - 20.