Kriştiano Ronaldo Portuqaliya millisində baş verən hadisələrlə bağlı öz versiyasını açıqlayıb.

Futbolmedia.az xəbər verir ki, 41 yaşlı futbolçu baş məşqçi Jorje Jesusun sentyabrın 27-də Norveçlə keçirilən UEFA Millətlər Liqası matçında onu meydana buraxmamasından sonra Portuqaliya millisinin düşərgəsini tərk edib. Hücumçunun bundan sonra milli komandada oynamamaq qərarı verdiyi bildirilirdi.

“Verdiyim sözə uyğun olaraq, milli komanda tariximdəki son mərhələ ilə bağlı baş verənləri birbaşa öz dilimdən danışmaq qərarına gəldim. 2026-cı il dünya çempionatından sonra Portuqaliya xalqına məktub yazdım və həmin məktubu hələ də saxlayıram. Orada milli komandadan birdəfəlik ayrılacağım zaman insanlara demək istədiyim sözləri qeyd etmişdim. Turnirin sonunda ABŞ-dan geri qayıdarkən Portuqaliya Futbol Federasiyasının prezidenti məndən millidən ayrılmaq qərarımı yenidən nəzərdən keçirməyimi istədi. Federasiya milli komandadakı karyeramı davam etdirməyimi istəyirdi və prezident bu məsələdə israr etdi.

Bundan dərhal sonra o, milli komandanın hazırkı baş məşqçisinin namizədliyi və adlarını mənə açıqlamadığı digər namizədlər barədə fikrimi soruşdu. Mən Federasiya prezidentinə bildirdim ki, fikrimcə, bu, düzgün seçimdir. Buna görə də hazırkı baş məşqçinin təqdim olunduğu gün onun təyinatına səmimi şəkildə sevindim. Nəticələr də bunun doğru seçim olduğunu göstərir.

Bir neçə gün sonra yeni baş məşqçidən ilk mesajı aldım. O, mənimlə şəxsən görüşmək istədiyini bildirdi. Razılaşdım və məzuniyyətimin sonunda görüşməyi qərarlaşdırdıq. Klubumun mövsümöncəsi hazırlıq keçdiyi milli komandanın bazasında görüşdük. Həmin gün məşqçi mənə güvəndiyini və onun layihəsində iştirakımın fundamental əhəmiyyət daşıdığını söylədi.