“Real”ın sabiq baş məşqçisi Fabio Kapello komandanı çalışdırdığı dövrü yada salaraq, braziliyalı keçmiş hücumçu Ronaldo Nazario ilə bağlı maraqlı açıqlama verib.

Futbolmedia.az xarici KİV-ə istinadən xəbər verir ki, italiyalı mütəxəssis, Ronaldonun Madridə gəldiyi dövrdə fiziki vəziyyətində ciddi dəyişiklik olduğunu bildirib:

“Madridə gələndə ondan soruşdum: “Dünya çempionatını qazandığın vaxt neçə kilo idin?” O dedi: 84. Sonra soruşdum: “Bəs indi?” Cavab verdi: 94″.

Kapello, həmin dövrdə onun davranışının komandaya mənfi təsir etdiyini də vurğulayıb:

“O, pis nümunə idi. Düzgün məşq etmirdi və komanda yoldaşlarını da buna təşviq edirdi. Buna görə də, prezidentlə birlikdə onunla yollarımızı ayırmağa qərar verdik”.

Kapello, həmçinin, İtaliyanın mərhum keçmiş baş naziri, “Milan”ın prezidenti olmuş Silvio Berluskoni ilə telefon danışığını da xatırladıb:

“Berluskoni mənə zəng edib soruşdu: “Ronaldo necədir?” Dedim: “Cənab nazir, o yaxşıdır, amma düzgün nümunə deyil. Daim gecə həyatındadır, çəki alıb və yalnız qadınlar haqqında düşünür”.

Kapellonun sözlərinə görə, ertəsi gün İtaliya mətbuatı artıq belə bir iddia yaymışdı ki, Ronaldo “Milan”a keçə bilər.