"Neftçi"nin baş məşqçisi Yuri Vernidub Ukrayna millisinin baş məşqçisi vəzifəsinə namizəd göstərildiyinə dair yayılan xəbərlərə münasibət bildirib.

Futbolmedia.az xəbər verir ki, o, bu haqda Misli Premyer Liqasının 27-ci turunun "Araz-Naxçıvan"la matçından (2:1) sonra təşkil olunan mətbuat konfransında danışıb.

Y.Vernidub Ukrayna mətbuatındakı iddiaların əsassız olduğunu dilə gətirib. 60 yaşlı mütəxəssis bu məsələ ilə bağlı onunla heç kimin əlaqə saxlamadığını söyləyib: "Son aylarda Ukraynadan heç bir jurnalistlə danışmamışam. Nə yazırlarsa, mənimlə əlaqəsi yoxdur. Yazırlar ki, Kənan Piriç qol buraxdıqdan sonra Vernidub onunla yollarını ayırmaq istəyir. Necə bunu yazmaq olar? Qol da buraxacaq, seyv də edəcək. Belə çıxır ki, buraxılan qoldan sonra hər qapıçı ilə yolları ayırmaq lazımdır? Elə suallarınız olarsa, mətbuat xidməti ilə danışa bilərsiniz, mən də müsahibəyə hər zaman hazıram. Ən azından orada doğru məlumatları bölüşəcəm.

Milliyə gəldikdə, bununla bağlı söz-söhbət çoxdan gedir. Mənə heç kim zəng etməyib. Orada 8-10 nəfər yazırlar, bəlkə mənim də adımı ora daxil ediblər. Ciddi bir şey olsaydı, zəng edərdilər. İndi mənim bir məqsədim var, o da "Neftçi"dir. Kluba və mənim qarşıma qoyulan hədəflərə çatmağı düşünürəm. Alınar-alınmaz, həyat göstərəcək. Bu öhdəliyi üzərimə götürmüşəmsə, sona qədər mübarizə aparacağıq.