UEFA “Benfika”nı Çempionlar Liqasının pley-off mərhələsində “Real"la oyunda azarkeşlərinin irqçi davranışına görə 40 min avro məbləğində cərimələyib.

Futbolmedia.az xəbər verir ki, bu barədə qurumun rəsmi saytında məlumat yayıb.

Fevralın 17-də keçirilən görüşdə “Real” Vinisius Juniorun qolu sayəsində 1:0 hesabı ilə qalib gəlib. Braziliyalı futbolçu vurduğu qolu künc bayrağı yanında rəqs edərək qeyd edib ki, bu da azarkeşlərin mənfi reaksiyasına səbəb olub. Nəticədə, Vinisiusla “Benfika”nın yarımmüdafiəçisi Canluka Prestianini arasında baş verən münaqişə səbəbindən oyun təxminən 10 dəqiqəlik dayandırılıb. Bu zaman “Real”ın futbolçusu hakimə rəqib oyunçu tərəfindən irqçi təhqirə məruz qaldığını bildirib. UEFA həmçinin qərar verib ki, Prestianni cavab oyunundan kənarlaşdırılsın.

Martın 25-də qurum “Benfika” azarkeşlərinin irqçi və ya diskriminasiya xarakterli davranışına görə kluba cərimə tətbiq edildiyini açıqlayıb. Bundan əlavə, klub UEFA turnirləri çərçivəsində keçiriləcək növbəti ev oyununda stadionun 500 yerlik hissəsinin qismən bağlanması ilə bağlı şərti cəza alıb. Sınaq müddəti 1 ildir.

Həmçinin əlavə qərarlar qəbul olunub: “Benfika” azarkeşlərin lazerdən istifadəsinə görə 8 min avro, meydana yad əşyaların atılmasına görə isə 25 min avro cərimələnib. Komandanın məşqçi köməkçisi Pedro Luis Ferreyra Maşadu qeyri-idman davranışına görə UEFA klub turnirlərində bir oyunluq cəza alıb.