“Real” klubu Fransa və İngiltərə futbol federasiyalarından narazı qalıb.

Futbolmedia.az xəbər verir ki, “Topskills Sports UK” nəşrinin məlumatına görə, buna səbəb zədədən yeni qayıdan Kilian Mbappe və hələ tam sağalmayan Cud Bellinqemin milliyə dəvət olunmasıdır. Klub hesab edir ki, mövsümün həlledici mərhələsində bu cür çağırışlar futbolçuların zədələrinin yenilənməsi riskini artırır.

Xüsusilə diz problemi yaşayan Mbappenin tam bərpa olmadan Fransa millisinin heyətinə cəlb edilməsi narazılıq doğurub. Fransalı hücumçu dizindəki problem səbəbindən üç həftə yaşıl meydanlardan kənarda qaldıqdan sonra yalnız bu həftə "Mançester Siti"yə qarşı oyunda meydana qayıdıb. "Real" rəhbərliyi Mbappenin milli komandada ağır oyunlara çıxmaq əvəzinə, klubda tədricən bərpa olunmalı olduğunu düşünsə də, Didye Deşam bu xahişləri görməzdən gələrək forvardı yoldaşlıq oyunları üçün heyətə daxil edib.

Bellinqem isə fevralın əvvəlindən bəri ciddi əzələ zədəsi səbəbindən "Real"ın heyətindən kənardadır və o vaxtdan bəri bir dəqiqə belə oynamayıb. Lakin bu, İngiltərə millisinin məşqçilər heyətinin onu heyətə dəvət etməsinə mane olmayıb. Klub daxilində futbolçunun hələ tam hazır olmadığı nəzərə alınaraq bu qərar “məsuliyyətsizlik” kimi qiymətləndirilib.