“Qalatasaray”ın hücumçusu Viktor Osimhen UEFA Çempionlar Liqasının 1/8 final mərhələsinin ilk oyununda “Liverpul” üzərində qazanılan qələbədən (1:0) sonra sosial şəbəkədə emosional paylaşım edib.

İstanbul təmsilçisinin qələbə qolunu Mario Lemina vurub. Həmin epizodda məhsuldar ötürmənin müəllifi isə Osimhen olub.

Futbolmedia.az xəbər verir ki, nigeriyalı forvard paylaşımında azarkeşlərin ona göstərdiyi sevgidən təsirləndiyini bildirib:

“Bu axşam mənim üçün həddindən artıq emosional idi, göz yaşlarımı güclə saxlayırdım. Açığını desəm, “Qalatasaray” azarkeşlərindən gördüyüm bu sevgini heç vaxt unutmayacam. İlk gündən mənə sevgi və hörmət göstərdiz – təkcə mənə yox, ailəmə və yaxınlarıma da.

Belə anlar mənə xatırladır ki, futbol sadəcə oyun deyil. Bu, sevgi, sədaqət və birlikdir. Bu emblem, bu klub və bu möhtəşəm azarkeşlər üçün mübarizəni davam etdirəcəyimə söz verirəm. Bu axşamı unudulmaz etdiyiniz üçün təşəkkür edirəm. Biz bir ailəyik”.