Kataloniya klubunun baş məşqçisi komandasını arxayınlaşmamağa çağırıb.

Futbolmedia.az xəbər verir ki, "Barselona"nın baş məşqçisi Hans-Diter Flik futbolçularını qələbə eyforiyasına qapılmamaq barədə xəbərdar edib.

Almaniyalı mütəxəssis mətbuat konfransında komandadakı əhval-ruhiyyə ilə bağlı bu fikirləri səsləndirib:

"Eyforiyadan qaçmaq lazımdır. Mən məhz bunu "Rasinq"lə oyundan əvvəl futbolçulara demişdim. Uğur bir dəfə və həmişəlik qazanılmır, onun üzərində hər gün işləmək lazımdır. İstər "Rasinq", istər "Real Sosyedad"la oyunlarda, istərsə də hər məşqdə eyni ciddiyyəti qorumalıyıq. Düzgün münasibət və mentalitet bizi qələbələrə aparır. Azarkeşlərimiz xatirinə maksimum gücümüzü ortaya qoyaraq bu ruhu saxlamalıyıq".

Xatırladaq ki, kataloniyalılar İspaniya Superkubokunun finalında əzəli rəqibləri "Real"a 3:2 hesabı ilə qalib gələrək kuboka sahib çıxıblar.

Qeyd edək ki, "Barselona" yanvarın 18-də, bazar günü La Liqa çərçivəsində səfərdə "Real Sosyedad"ın qonağı olacaq.