“Real”ın sabiq hücumçusu Raul Qonsales bildirib ki, “Barselona”nın futbolçusu Lamin Yamal 2026-cı il dünya çempionatında İspaniya millisinin əsas oyunçularından olmayacaq.

Futbolmedia.az AS-a istinadən xəbər verir ki, ispaniyalı keçmiş futbolçu, məşqçilərin Yamala sərbəstlik verməli olduqlarını bildirib:

“Hamımız bilirik ki, o önəmli oyunçu olacaq, amma Yamal millinin açar fiquru olmayacaq. Daha təcrübəli oyunçular ona dəstək verməlidirlər ki, meydanda daha rahat çıxış edə bilsin və hər oyunda komandamızı xilas etməyə məcbur qalmasın. Ona sərbəstlik verməliyik.

Laminin çox istedadı var və çox gəncdir, bunu həm klubunda, həm də İspaniya millisində göstərdi. Mən onu ilk dəfə “Santyaqo Bernabeu”da Braziliya millisi ilə yoldaşlıq oyununda gördüm və o, həqiqətən fərqli səviyyədə idi. Amma o, hələ özünə uyğunlaşma prosesindən keçir. Düşünürəm ki, onun üzərində işləməli olduğu məqamlar var. Yaxşı çıxış edərsə, bu, bizi ikinci dünya kubokunu qazanmaq arzumuza yaxınlaşdıracaq”.