"Ayntraxt"ın futbolçusunun Fransaya qayıtması gündəmə gəlib.

Futbolmedia.az xəbər verir ki, Almaniya klubunun hücumçusu Elye Vahi karyerasını Fransada davam etdirə bilər. "Footmercato" nəşrinin məlumatına görə, futbolçu "Nitsa" klubuna keçid etməyə hazırlaşır.

Almaniya təmsilçisinin heyətində özünü doğrultmaqda çətinlik çəkən oyunçu Liqa 1-də karyerasını yenidən canlandırmaq niyyətindədir. Vahinin artıq "Nitsa" ilə şəxsi razılıq əldə etdiyi bildirilir. Hazırda klublar arasında danışıqlar davam edir. Fransa klubunun rəhbərliyi böyük məbləğdə xərc çəkmək istəmədiyi üçün keçidin icarə əsasında reallaşması ehtimalı yüksəkdir.

Xatırladaq ki, hücumçu bu ilin yanvarında 26 milyon avro qarşılığında "Marsel"dən "Ayntraxt"a transfer olunmuşdu. O, Frankfurt klubunun forması ilə keçirdiyi 25 oyunda cəmi 1 qol vurub və 3 məhsuldar ötürmə ilə yadda qalıb. Futbolçunun klubla müqaviləsi 2030-cu ilə qədər qüvvədədir.