İspaniya prokurorları İspaniya Kral Futbol Federasiyasının (RFEF) keçmiş prezidenti Anhel Mariya Vilyar üçün 15,5 il həbs cəzası istəyiblər.

Futbolmedia.az xəbər verir ki, bu barədə "Marca" məlumat yayıb.

Vilyar vəzifə səlahiyyətlərindən sui-istifadədə, korrupsiyada və 2007-2017-ci illər arasında bağlanmış müqavilələr üzrə vəsaitləri mənimsəməkdə ittiham olunurdu. Federasiyaya dəyən ziyan 4,5 milyon avro təşkil edib.

Müstəntiqlərin fikrincə, Anhel Mariya Vilyar vəzifəsindən oğlu Qorka Vilyarın maraqlarına uyğun gəlirli müqavilələr bağlamaq üçün istifadə edib. O, İspaniya millisi ilə yoldaşlıq oyunları keçirmək üçün digər ölkələrin futbol federasiyaları ilə müqavilələr bağlayıb. Eyni zamanda, Qorka özünün "Sport Advisers SL" şirkəti vasitəsilə rəqibləri və matçların şərtlərini sseçib ki, bu da federasiyaya maddi ziyan vurub.

Korrupsiyaya Qarşı Mübarizə İdarəsi Gorka Vilyar da daxil olmaqla, iş üzrə səkkiz müttəhimə qarşı ittiham irəli sürüb. İstintaq onun 7 il müddətinə azadlıqdan məhrum edilməsini tələb edir. Təqsirləndirilənlər arasında müstəntiqlərin 6 il yarım həbs tələb etdiyi RFEF-in keçmiş vitse-prezidenti Xuan Padron da var.