"Araz-Naxçıvan"ın baş məşqçisi Elmar Baxşıyev Misli Premyer Liqasının 27-ci turunda "Şamaxı" ilə 1:1 hesablı heç-heçə etdikləri oyunu şərh edib.

Futbolmedia.az xəbər verir ki, o, matçdan sonra keçirilən mətbuat konfransında deyib:

"Ağır komandaya qarşı oynadığımızı bilirdik. Oyunu iki hissəyə bölərdim. Birinci hissədə biz yaxşı oynadıq, epizodlar yaratdıq, qol vurduq. Fasilədən sonra rəqib epizodlara girdi və hesabı bərabərləşdirdi. Elə oyun idi ki, uda da, uduza da bilərdik. Bir xal qazandıq. Millinin oyunları ilə əlaqədər yaranacaq fasilədən sonra heyətimizin tam komplektləşəcəyinə ümid edirəm. Təsəvvür edin, heyətimizin 7 nəfər üzvü zədə və cəza səbəbindən oyunda iştirak etmirdi. Belədə rotasiya etmək, oyunu gücləndirmək çətin olur".

Mütəxəssis onun komandasından heç bir futbolçunun millinin qarşıdakı toplanışına çağırılmamasına reaksiya verib: "Millinin heyəti ilə bağlı şərh vermək istəmirəm. Bu baş məşqçinin seçimidir. Amma "Araz-Naxçıvan"da da komandaya milliyə dəvət olunacaq futbolçuların olduğunu düşünürəm".