Türkiyə təmsilçilərinin - "Qalatasaray", "Fənərbaxça", "Beşiktaş" və "Başakşehir"in avrokuboklarda bu həftə keçirəcəyi matçlar üçün hakim təyinatları açıqlanıb.

Futbolmedia.az xəbər verir ki, Avroliqanın Liqa mərhələsinin 4-cü turunda "Qalatasaray" evdə "Tottenhem"lə, "Fənərbaxça" səfərdə "AZ Alkmaar"la, "Beşiktaş" öz meydanında "Malmö" ilə üz-üzə gələcək. Konfrans Liqasının Liqa mərhələsinin 4-cü turunda isə "Başakşehir" "Kopenhagen"in qonağı olacaq.

UEFA bu matçlara hakim təyinatlarını açıqlayıb.

"Qalatasaray" - "Tottenhem" görüşünün referisi Laurens Visser olacaq. Ona Rien Venizer, Tibo Neyssen və Saymon Burdoui (dördüncü hakim) kömək edəcəklər. Adıçəkilən ədalət təmsilçiləri Belçikadandır.

"AZ Alkmaar" - "Fənərbaxça" qarşılaşması şotlandiyalılara tapşırılıb. Baş hakim Con Bitona Daniel Makferlen, Devid Makqiçi və Kalum Skoot (dördüncü hakim) kömək edəcək.

"Beşiktaş" - "Malmö" matçında almaniyalılar iş başında olacaq. Referi kimi Sven Yablonski, laynsnman kimi Lasse Koslovski və Eduard Beytinqer, dördüncü hakim kimi isə Tobias Rişel fəaliyyət göstərəcək.

"Kopenhagen" - "Başakşehir" oyununa niderlandlı hakimlər təyin olunub. Referi Joy Koija Yost van Zuilen, Patrik İnia və Aleks Bos (dördüncü hakim) kömək edəcək.

Qeyd edək ki, "Beşiktaş" - "Malmö" matçı sabah (saat 19:30), "Qalatasaray" - Tottenhem" (saat 21:45), "AZ Alkmaar" - "Fənərbaxça" (saat 00:00) və "Kopenhagen" - "Başakşehir" (saat 00:00) görüşləri isə noyabrın 7-də keçiriləcək.