"Nəticədən razıyam. Kifayət qədər şanslarımız oldu. Rəqibə açıq oyun təklif etdik. Belə oyun təklif edirsənsə, rəqibə fürsətlər də vermiş olursan".

Futbolmedia.az xəbər verir ki, bu sözləri İsveç millisinin baş məşçisi Yon Dal Tomasson Millətlər Liqasının 1-ci turunda bu gün Bakıda Azərbaycan millisinə qalib gəldikləri oyundan sonra mətbuat konfransında deyib.

O, 3:1 hesablı qələbəni belə şərh edib: "İlk hissədə önə doğru vertikal paslar verirdik, amma ardı gəlmirdi. Fasilədə bununla bağlı danışdıq. Hərəkət etmək lazım idi. Topu itirdikdən sonra komandamız yerini tuta bilmirdi, geri çəkilirdik, rəqibə fürsətlər verirdik. Qapıçının çıxışından çox razıyam, penaltini qaytardı. Qələbə ilə başladıq. Önəmli olan budur. Bakıda belə nəticə əldə etmək, kifayət qədər qol epizodu ilə qələbə qazanmaq çox çətindir".

Tomasson oyunlarında müəyyən çatışmazlıqların olduğunu da bildirib: "Topu itirəndə yaxşı reaksiya verməliyik. Bunu edə bilmədik. Öndə təzyiq etmək lazım idi. Oyunun müəyyən epizodlarında komanda passiv çıxış etdi. Hücumda mükəmməl deyildik, yaxşı idik, 11 epizodumuz var idi. Bəzi son mərhələyə gəlib çıxmayan epizodlar da oldu".

Baş məşqçi Azrbaycan millisinin İstifadə edə bilmədiyi penaltinin matçın qırılma nöqtəsi olmadığını deyib: "Əla qurtarış idi. Dönüş nöqtəsi idi? Deməzdim. İnanıram ki, penaltidən qol buraxsaydıq da, qollar vuracaqdıq. Çünki kifayət qədər qol epizodları yaradırdıq".