Türkiyənin “Beşiktaş” və “Fənərbaxça” klublarının “Qarabağ”ın futbolçusu Leandro Andradenin xidmətində maraqlı olduqları bildirilir.

Futbolmedia.az [b][/b]xəbər verir ki, bu iddia ilə Portuqaliyanın “A Bola” nəşri çıxış edib. Bununla əlaqədar hər iki Türkiyə təmsilçisinin Ağdam klubuna müraciət etdiyi də qeyd olunub. Lakin bu təklifin qəbul edilmədiyi vurğulanıb.

Bildirilib ki, “Qarabağ” futbolçusu üçün onun müqaviləsində göstərildiyi kimi 4 milyon avro təzminat tələb edib.

Həmçinin iddia olunur ki, Rusiyanın 3 klubunun nümayəndəsi də Kabo-verdeli yarımmüdafiəçinin agenti ilə əlaqə quraraq mümkün transfer şərtlərini öyrəniblər.

Xatırladaq ki, 24 yaşlı Andrade bu ilin fevralında “Qarabağ”la müqaviləsini 2027-ci ilin iyununa kimi uzadıb.