İsrailin “Hapoel” (Beer-Şeva) klubu Kadi Borges üçün üçün “Qarabağ”a yeni təklif etməyə hazırlaşır.

Futbolmedia.az xəbər verir ki, bu haqda “Israel Hayom” saytı məlumat yayıb. Daha öncə yayılan xəbərə görə, “Hapoel” braziliyalı yarımmüdafiəçi üçün Ağdam təmsilçisinə 400 min avro təklif edib.

“Qarabağ”ın mətbuat xidmətinin rəhbəri Gündüz Abbaszadə bugünlərdə Qol.az-a açıqlamasında Kadiyə görə kluba rəsmi müraciət edildiyini, lakin məbləğin yazıldığı kimi olmadığını söyləyib: “Amma biz hazırda yalnız Çempionlar Liqasına, bu mövsüm keçirəcəyimiz ilk oyunlara köklənmişik. Kadi isə müqavilə ilə “Qarabağ”a məxsus futbolçudur”.

“Israel Hayom” saytı isə iddia edir ki, “Qarabağ” Kadiyə görə daha yüksək təzminat tələb edib. “Bununla belə, “Hapoel” onu da anlayır ki, braziliyalı oyunçunun “Qarabağ”la müqaviləsi gələn yay başa çatır. Əgər müqavilə uzadılmasa, o, azad agent kimi başqa kluba pulsuz keçəcək. Ona görə də “Qarabağ” Kadini bu yay sata bilər. “Hapoel” yenidən Azərbaycan klubuna müraciət etmək barədə düşünür. İmtina cavabı olacağı halda, İsrail klubu alternativ variantlar axtaracaq” – deyə yazıda bildirilib.