AFFA Canni De Byazinin gedişindən sonra boş qalan Azərbaycan millisinin baş məşqçi vəzifəsi ilə bağlı İşçi Qrupu yaradacaq.

Futbolmedia.az xəbər verir ki, bu barədə AFFA-nın baş katibi Sərxan Hacıyev məlumat verib.

İcraiyyə Komitəsinin iclasından sonra jurnalistlər üçün brifinq keçirən S.Hacıyev qeyd edib ki, yeni yaradılacaq İşçi Qrupu millinin baş məşqçi vəzifəsinə namizədləri nəzərdən keçirəcək. Onun sözlərinə görə, İşçi Qrupda AFFA İcraiyyə Komitəsindən və böyü ehtimalla kənardan şəxslər təmsil olunacaq: “Onlar tərəfindən baş məşqçi vəzifəsi ilə bağlı təkliflər veriləcək. Hər bir amil detallı şəkildə amil nəzərə alınaraq və analiz olunaraq İcraiyyə Komitəsində müzakirəyə çıxarılacaq və qəti qərar veriləcək. İşçi Qrupunun üzvləri ilə bağlı hazırda məlumat verə bilmirik. Yaxın zamanlarda bununla bağlı ictimaiyyətə məlumat verəcəyik".

O, "De Byazi özü əvvəlcən müqavilənin uzadılmaması istəsəydi, İcraiyyə Komitəsi necə qərar verəcəkdi?" sualına belə cavab verib: "Hazırda bu suala cavab vermək çətindir. Çünki belə olmasaydı, hadisələr başqa istiqamətdə cərəyan edəcəkdi. Məhz buna görə də ilk növbədə baş məşqçisinin hesabatı dinlənildi və özü tərəfindən belə xahiş olundu. Belə xahiş olmasaydı, İcraiyyə Komitəsi hansı qərarı verərdi, onu demək bir az çətindir".

S.Hacıyev millinin yeni baş məşqçisinin adının yanvara kimi müəyyənləşməli olduğunu bildirib: “Martda millinin oyunları (yoldaşlıq) başlayır. Ona görə də məqsədəuyğun olar ki, baş məşqçi məsələsi matçlara bir neçə ay qalmış həllini tapsın. Amma bununla bağlı konkret son tarix qoyulmayıb. Lakin düşünürəm ki, yaxın 1-2 ay ərzində bu məsələ həllini tapsın".

Yeni baş məşqçinin gələcəkdə kim olması ilə bağlı suala cavabında S.Hacıyev deyib: "Müzakirələrdə əsas kriterya bu oldu ki, yeni baş məşqçi yerli mentaliteti tanıyan biri olsun. Yerli mentaliteti, futbolçuları tanıyan mütəxəssislərə üstünlük veriləcək. Yerli mədəniyyəti bilən namizədin olması ehtimalı böyükdür".

O, millinin baş məşqçisinin yerli mütəxəssis ola biləcəyi ilə bağlı suala cavabında deyib: "Bu dəqiqə bu haqda 100 faiz nəsə demək çətindir. Lakin yeni baş məşqçinin yerli olması ehtimalı da az deyil".