Ötən həftə Avropa Liqasında 3-cü tur başa çatdı.

Futbolmedia.az xəbər verir ki, UEFA-nın rəsmi saytında turnirin qrup mərhələsinin yekunları ilə bağlı statistikasında Azərbaycan azarkeşləri üçün diqqətcəkən məqamlar var. Şübhəsiz ki, bu, həmin yarışda ölkəmizi təmsil edən "Qarabağ"la bağlıdır.

Ağdam təmsilçisi son turda Leverkuzendə "Bayer"lə matçda 1:5 hesabı ilə məğlub olsa da, yarışda ən çox qələbə qazanan (3 oyun, 2 qələbə) kollektivlər sırasındadır. Qurban Qurbanovun komandası 2 qələbə qazanmış 7 komandadan biridir və ümumi siyahıda 5-ci yeri tutur. İlk 4 pilləni "Liverpul", "Roma", "Bayer" (hamısı 3 qələbə) və "Atalanta" (2 qələbə, 1 heç-heçə) tutur.

"Qarabağ" rəqib qapısına ən çox zərbə endirən komandalar sırasında 17-cidir. 38 zərbədən 11-i çərçivəyə, 16-sı əyri gedib, 11-i isə bloklanıb. Ağdam təmsilçisi dəqiq ötürmə edən komandalar sırasında isə 13-cüdür (83 faiz - 1396 ötürmədən 1162-si dəqiq olub).

Qayda pozuntularına ən çox yol verən 32 iştirakçısı arasında isə "Qarabağ" 5-ci yeri tutur (1-ci yer LASK, 47 fol). Ağdam təmsilçisi 42 dəfə rəqiblərinə qayda pozutusuna yol verib, 8 sarı vərəqə alıb.