"Bilirik ki, bizim üçün çox önəmli oyundur. Hazırlığımız pis keçməyib. Futbolçuların durumu yaxşıdır. Hamımız ciddi formada oyuna hazırlaşırıq. Çalışacağıq ki, sabah meydanda əlimizdən gələnin ən yaxşısını edək".

Futbolmedia.az xəbər verir ki, bu sözləri "Qarabağ"ın baş məşqçisi Qurban Qurbanov sabah Avropa Liqasının 3-cü təsnifat mərhələsində Bakıda çərçivəsində HİK-ə qarşı keçirəcəkləri ilk oyundan öncə təşkil olunan mətbuat konfransında deyib.

Mütəxəssis komandadakı müəyyən gərginliyə baxmayaraq, narahat olmadığını bildirib: "Ardıcıl 2 uğursuz oyundan sonra sabahkı matçda komandada gərginlik olmayacağını desəm, yalan olar. Amma biz peşəkarıq, belə hallarla üzləşmişik. İllərdir ki, bu yolla gəlirik. Mənim narahatlığım yoxdur. Görsəm ki, komandam oyununu itirib, gücü yoxdur, o zaman narahat olaram. Yox, biz heç bir rəqibdən çəkinmiriksə, onlara qalib gəlmək gücündə olduğumuzu biliriksə, narahatlığımıza nə gərək var? Amma hər məğlubiyyətdən, düşünmədiyimiz hesablardan sonra gərginlik hiss olunur. Sabah yaxşı oyun göstərmək istəyirik. Bəlkə sürət, dinamika istədiyimiz kimi olmasın. Amma sabah 90 dəqiqə meydandakı oyuna köklənib, səhvlərdən uzaq olmaq istəyirik".

O, yenidən Tofiq Bəhramov adına Respublika stadionunda oynamalarına belə münasibət bildirib: "Əvvəl də demişdim ki, bizim üçün Bakının hər yeri doğmadır. Əlbəttə ki, "Tofiq Bəhramov"a daha tanışıq. Orada da çoxdandır ki, oynamamışıq. Hər bir halda stadionun durumu yaxşı idi, pis deyildi. Məşqimiz etmişik. İnanıram ki, bu məqamın faydası olar".

Q.Qurbanov 2 il əvvəl HİK-in "Neftçi" ilə oynamasının ciddi əhəmiyyət kəsb etmədiyini vurğulayıb: "Keçmişə çox da baxmadıq. Bu gün futbol elə səviyyəyə gəlib ki, ildən-ilə dəyişikliklər olub. Bugünkü komandanın durumu ilə yaxından tanış olmağa çalışdıq. Hər komandanın təcrübəsi artır. Düşüncəmiz sırf bugünkü HİK-lə bağlıdır. Bu komandanın təhlükəli oyunçuları, hücumları var. Onlara diqqət ayırmışıq".

"Qarabağ"ın çalışdırıcısı heyətdə ciddi problemlərinin olmadığını qeyd edib: "Futbolçuların durumu pis deyil. Ciddi problemi olan oyunçu yoxdur. Zədəliləri bilirsiniz. Son çempionat oyununda bəzi futbolçularda mikro zədələr var. Lakin bunun sabahkı oyuna mane olacağını düşünmürəm. Heyətdə ciddi dəyişiklik gözlənilmir".

O, Finlandiya çempionunun müdafiə xəttinin güclü olduğunu söyləyib: "İndi rəqibin güclü, yaxud zəfi tərəflərini desəm, düzgün çıxmaz. Amma rəqibin çox yaxşı kollektiv müdafə xətti var. "Rakov"un oyun tərzinə yaxın futbol sərgiləyirlər. Sürətli oyunçuları var. Buna diqqət etməliyik".

Q.Qurbanov “Rakov”la oyun və “Zirə”yə məğlubiyyətindən sonra tənqidlərə məruz qalması barədə sualı belə cavablandırıb: "Bakını, vətənimi çox sevirəm. Biz hamımız bu vətənin övladlarıyıq. Narazılıq, etiraz edirlərsə, övlad kimi bunu düzgün qəbul edirik. Biz də vətən üçün çalışırıq ki, məsuliyyətli olaq. Bacardığımızdan da artığını etməliyik ki, bizim vətənimizə, xalqımıza az da olsa, faydamız dəysin. Bunu hər zaman şərəflə yerinə yetirməyə çalışmışam. Sırf bu məsələ haqda çox da fikir bildirmək istəmirəm. Normal hallardır. Mən azərbaycanlılarımı və vətənimi çox sevirəm".