"Qarabağ"ın baş məşqçisi Qurban Qurbanov Macarıstan "Ferentsvaroş"unun futbolçusu Endre Botkanın Çempionlar Liqasının 3-cü təsnifat mərhələsinin ilk oyunu zamanı Tofiq Bəhramov adına Respublika stadionuna kabab iyi və tüstüsünün gəlməsi barədə fikirlərinə münasibət bildirib.

Futbolmedia.az xəbər verir ki, o, Premyer Liqamızın 1-ci turunda "Səbail"l' matçdan (3:1) sonra keçirilən mətbuat konfransında bununla bağlı deyib:

"Bilmirəm, Botka bunu hansı mənada deyib. Hava hamımız üçün eynidir. Əksinə, sərin havada oynanılan məşq daha rahat oynanılır. Qaldı ki, onların burnuna Azərbaycan kababının iyinin gəlməsinə sevinirəm. Bizdə kabab iyi gəlirsə, Avropa stadionlarından da sosiska iyi gələ bilər. Biz hamımız azərbaycanlıyıq. Hər bir xalqın öz adət-ənənəsi var. Ümumiyyətlə, əcnəbilər həmişə Azərbaycanda kababdan danışırlar. Kim o kababın dadına baxırsa, arzu edirsə, bir də Azərbaycana gəlmək istəyir. Tüstü 90 dəqiqə olmadı. Sevinirəm ki, bizim kabab haqda məlumatlanacaqlar ki, dad, ləzzət haradan gəlir?".

Qeyd edək ki, "Qarabağ" - "Ferentsvaroş" görüşü 1:1 hesabı ilə başa çatıb. Bu komandalar arasında avqustun 9-da "Qroupama Arena"da oynanılacaq cavab oyunu Bakı vaxtı ilə saat 22:00-da başlayacaq.