"Makkabi"nin (Tel-Əviv, İsrail) baş məşqçisi Vladimir İviç Konfrans Liqasının 2-ci təsnifat mərhələsində "Zirə"yə Bakıda qalib gəldikləri ilk matç (3:0) barədə fikirlərini bölüşüb.

Futbolmedia.az xəbər verir ki, 45 yaşlı mütəxəssis oyundan sonra təşkil olunan mətbuat konfransında 3 qol vurmaqlarına baxmayaraq, pik formalarında olmadıqlarını deyib:

"Fantastik futbol oynamadıq. Qələbə qazanmalı idik. Bunu da bacardıq. Hələlik pik formamızda deyilik. "Zirə" də ideal formada deyil. Ötən mövsüm oyunlarına baxdığım "Zirə" daha yaxşı idi. Məsələn, "Qarabağ"a qarşı daha yaxşı oynamışdılar. Bəlkə də bu ilk rəsmi matç keçirmələrindən irəli gəlir. Əminəm ki, "Zirə" getdikcə oyununu daha da qaydasına salacaq. Cavab matçı bir növ duelin ikinci hissəsi olacaq".

Qeyd edək ki, bu komandalar arasında cavab görüşü 1 həftə sonra İsraildə olacaq.