Bu həftə Azərbaycan Premyer Liqasında 19-cu turun oyunları keçiriləcək.

Futbolmedia.az xəbər verir ki, “Qəbələ” martın 13-də “Zirə” ilə görüşəcək. Qəbələ şəhər stadionunda keçiriləcək qarşılaşma iki rəqib arasında ümumilikdə 28-ci duel kimi tarixə düşəcək.

Əvvəlki 27 qarşılaşmada 10 qələbə qazanan “Qəbələ” 12 heç-heçə edib və 5 dəfə məğlub olub. Rəqib qapısına 36 qol vuran “Qəbələ” 24 top buraxıb. “Qırmızı-qaralar”ın bu oyunlarda ən yaxşı bombardiri 4 qol vuran Aleksey Qaydır.

İndiyədək keçirilən 27 görüşdən 25-i çempionat, 2-si kubok çərçivəsində keçirilib. Premyer Liqada 8 dəfə rəqibini üstələyən "Qəbələ" 12 matçdan 1 xalla ayrılıb. Digər 5 matçda Bakı klubu qələbə qazanıb. Bu oyunlarda 29 qol vuran “qırmızı-qaralar” 22 top buraxıb.

“Qəbələ” 13-cü dəfə “Zirə”ni öz meydanında qəbul edəcək. 5 qələbəsi olan meydan sahibləri 7 sülhə imza atıb və yalnız bir dəfə uduzub. Doğma divarlar arasında 19 qol vuran "Qəbələ" 10 top buraxıb.

Xatırladaq ki, martın 13-də Qəbələ şəhər stadionunda keçiriləcək “Qəbələ” - “Zirə” matçı saat 16:00-da başlayacaq.