Portuqaliya millisinin futbolçusu Kriştiano Ronaldo Avro-2020 öncəsi fikirlərini bildirib.

Futbolmedia.az "360" jurnalına istinadən xəbər verir ki, o, turnirdə oynayacaqları bütün komandalara hörmət etdiklərini deyib: "Asan matçlar olmayacaq. Özümü Avropa çempionatında ilk dəfə çıxış edirmiş kimi hiss edirəm. 2004-cü ildə ilk dəfə oynadığım qədər, bəlkə də ondan da çox motivasiyalıyam".

Avro-2016-nın qalibi olan yığmanın hücumçusu bildirib ki, bu dəfə də turnirin favoritlərdəndirlər: "Biz keçmiş çempionuq və bir daha favoritlər arasındayıq. Titul vəd etməyin və ya proqnoz verməyin mənası yoxdur. Söz verə bilərəm ki, hər matçda qələbə qazanmağa çalışacağıq".

Qeyd edək ki, Portuqaliya Avro-2020-nin qrup mərhələsində ilk oyununu iyunun 15-i Macarıstana qarşı keçirəcək.